முல்லைத் திணை வாசன் :கவிதை

முல்லைத் திணை வாசன்

பசுபதி

‘அம்மன் தரிசனம்’ 2005 தீபாவளி மலரிலும், ‘ ஷண்முக கவசம்’ 2014 மலரிலும் வந்த கவிதை. 

கண்ணன் புகழ்சொல்லிக் கும்மியடி! -- வளைக்

. கைகள் குலுங்கிடக் கும்மியடி !

வண்ண மயிலிற காடிவரும் -- அவன்

. மாண்பினைப் பாடியே கும்மியடி !

பாரதம் போற்றிடும் ஏகனடி! -- அவன்

. பார்த்தனின் தேருக்குப் பாகனடி!

நாரண பூர்ணாவ தாரனடி! -- கோதை

. நாச்சியார் நெஞ்சுறை சோரனடி!        (கண்ணன்)

இருவர்க்குச் சேயான கண்ணனடி! -- கருணை

. ஈரக் கருமுகில் வண்ணனடி!

குருகுலப் பாண்டவர் நண்பனடி! --ஏழைக்

. குசேலர்க் கருள்செய்த பண்பனடி!        (கண்ணன்)

மாமலை தூக்கிய பாலனடி! -- தன்

. மாமன் கொடுமைக்குக் காலனடி!

நால்மூவர் பாடிய சீலனடி ! -- ஸ்ரீ

. நாதனடி அவன் போதனடி!              (கண்ணன்)

சங்கத் தமிழரின் மாயவன்டி! -- வேத

. சாரமாம் கீதையின் நாயகன்டி !

நங்கைநப் பின்னை மணாளனடி! -- கோபன்

. நந்தன் மனம்மகிழ் ஆயனடி!             (கண்ணன்)

முல்லைத் திணையதன் வாசனடி! -- அவன்

. மோகனப் புன்னகை ஈசனடி!

புல்லாங் குழலிசை கேசவன்டி! -- அவன்

. பூதேவி சீதேவி நேசனடி !              (கண்ணன்)

~*~o0O0o~*~

தொடர்புள்ள பதிவு :

கவிதைகள்