இன்று புதிதாய்ப் பிறந்தோம்
பசுபதி
"இன்று புதிதாய்ப் பிறந்தோம் – எம்
எஞ்சிய வாழ்விற் கிதுவே முதல்நாள் ”
என்றே தினமும் உரைப்போம் ! – நம்
யந்திர வாழ்வின் சுமையைக் குறைப்போம்!
துன்பத்தின் வேரைத் தகர்ப்போம் ! – நம்
சோர்வை மறக்கக் கரங்கள் இணைப்போம் !
அன்பின் பெருமை உணர்வோம்! – எமை
ஆளும் நெறியாய் அவிரோதம் ஏற்போம்!
பார்க்க ஒளிர்ந்திடும் யாவும் – பொற்
பாளத் துகள்கள் எனவெண்ணல் வேண்டா!
தேர்வுகள் செய்திடக் கற்போம்! – நல்ல
தேன்மலர் தேடிடும் வண்டுகள் போல!
முப்பால் தினமும் குடிப்போம்! – நம்
முன்னோரின் நூல்களைப் பட்டாய் மதிப்போம்!
ஜப்பான் மொழியையும் கற்போம் – மேலைச்
சாத்திரச் சாற்றை வாழ்வில் கலப்போம்!
மின்வான் தனிலே உலாவி – விண்
மீன்கள் பறித்துத் தமிழில் பதிப்போம்!
வன்பால் சகத்தினை மாற்றி – நம்
வாழ்வின் வளத்தைப் பெருக்குவோம் வாரீர்!
இடுகைகள்
கருத்துகள் இல்லை:
கருத்துரையிடுக