1717. சங்கீத சங்கதிகள் - 257

மதுரை சோமு - 8

சங்கீத சிங்கம்

மீ.ப.சோமு

டிசம்பர் 9. 'மதுரை சோமு'வின் நினைவு தினம்.

மதுரை சோமு பற்றி அவருடன் நெருக்கமாகப் பழகியவரும், இசையிலும் எழுத்திலும் அறிஞருமான மீ.ப.சோமு சொன்னது...  அவர்  மறைந்தவுடன் விகடனில் வந்த கட்டுரை.

"1941-ம் வருஷம், திருச்சி வானொலியில் நான் அறிவிப்பாளராகப் பணிபுரிந்துகொண்டிருந்த சமயம் அது. ஒரு நாள், சங்கீத மேதை சித்தூர் சுப்பிரமணியப் பிள்ளையின் நிகழ்ச்சியை அறிவிப்பு செய்யவேண்டிய பணி இருந்தது. சித்தூரார், தான் பாடவிருக்கும் கீர்த்தனையின் பெயரைச் சொல்லி விட்டு, தன் பின்னால் இருந்த ஒரு சிறுவனைப் பார்ப்பார். அந்தச் சிறுவன் மெல்லிய புன்னகை ஒன்றை உதிர்த்ததும், அடுத்த கீர்த்தனையின் பெயரைச் சொல்வார். இப்படி அந்தச் சிறுவன் அங்கீகரித்தவைதான் அன்று பட்டியலாகியது. சித்தூராரின் நம்பிக்கைக்குரிய அந்தச் சிறுவன் - சிஷ்யன்தான் மதுரை சோமு என்றழைக்கப்பட்ட சோமசுந்தரம்.

தனது குரு உட்கார இடம் பண்ணித் தருவதிலிருந்து, அவருக்கு வியர்க்கும்போது மேல் துண்டால் துடைத்துவிடுவதுவரை சோமுவின் குருபக்திக்கு எல்லையே கிடையாது.

ஒரு நாள், வானொலியில் கச்சேரி செய்ய குருவுடன் வந்த சோமுவையே கேட்டேன்... "நீங்கள் ஒரு தனிக் கச்சேரி செய்யவேண்டியது தானே?' என்று. அதற்கு சோமு, 'தலை இருக்க வால் ஆடக்கூடாது, சார்!' என்று மிகவும் அடக்கத்துடன் கூறினார். இது நடந்து சில காலம் கழித்து, ஒரு நாள் என்னைப் பார்க்க, சோமு வீட்டுக்கு வந்தார். 'நான் இப்போது தனிக் கச்சேரி செய்கிறேன். என் கச்சேரியைக் கேட்க நீங்கள் வரவேண்டும்' என்று அழைத்தார். அவர் கச்சேரியைக் கேட்டு மெய்ம்மறந்தேன். வெறும் தம்புரா மீட்டி, புன்சிரிப்பை மட்டுமே வெளிக்காட்டிக் கொண்டிருந்த அந்த இளைஞனுக்குள் எப்பேர்ப்பட்ட அற்புதமான இசை வல்லமை குடிகொண்டிருந்தது என்பதை உணர்ந்தேன். இதை மனத்தில் கொண்டு, அவரை 'இசை பயில்வான்' என்று நான் குறிப்பிட்டதை அவர் மிகவும் ரசித்தார். பலவீனம் என்பதே இல்லாத சத்தான குரல்; எவ்வளவு உச்சத்துக்குப் போனாலும் அந்தக் குரல் சன்னமடையாது. கீச்சிடாது. அதேசமயம் கீழே இறங்கும்போது, சுருதி பிசகாமல் ஸ்வர ஸ்தானத்தை தொட்டு நின்று பேசும்.

1963-ல் இருந்து சென்னை தமிழிசைச் சங்கத்தின் நிபுணர் குழுவில் என்னோடு உடன் அங்கம் வகித்துப் பணியாற்றினார் மதுரை சோமு. 'இசைப் பேரறிஞர்' பட்டத்துக்குக் கலைஞர்களைத் தேர்ந் தெடுப்பது முதல் விழா நிகழ்ச்சிகளை அமைப்பதுவரை எல்லா செயல்களிலும் என்னோடும், தமிழிசை சங்க நிர்வாகிகளோடும் கருத்து ஒருமித்து மிகவும் பண்பாட்டுடன் நடந்துகொள்வார்.

மதுரை சோமு இசைப் புலமை, குரல் வளம் இரண்டும் இணைந்த ஒரு சிங்கம். அவர் கர்னாடக ரசிகர்களுக்கும் பாடினார்; ஜனரஞ்சக ரசிகர்களுக்கும் பாடினார். அவர் மறைந்துவிட்டாலும், கேட்பவர்களுக்குப் பொருள் புரியும்படி பாடிய அவருடைய கம்பீரமான குரல் நம் காதில் ஒலித்துக்கொண்டே இருக்கும்!"

தொடர்புள்ள பதிவுகள்:

மதுரை சோமு

சங்கீத சங்கதிகள்

1274. சங்கீத சங்கதிகள் - 184

மதுரை சோமு - 7

பாரதியும் தமிழிசையும்
டாக்டர் மதுரை எஸ்.சோமசுந்தரம்

2019. மதுரை சோமு அவர்களின் நூற்றாண்டு வருடம்.

‘பாரதி’யாரின் நூற்றாண்டு மலர் ஒன்றில் ( 1982)  அவர் எழுதிய  ஒரு கட்டுரை.

[  If you have trouble reading some of the writings in an image , right click on each such image ,  choose the option 'open image in a new tab' , then in the new tab , use browser's  zoom facility to increase the image size and read with comfort. Or download each image in your computer and then read.  ]


தொடர்புள்ள பதிவுகள்:

மதுரை சோமு

சங்கீத சங்கதிகள்

1232. சங்கீத சங்கதிகள் - 178

மதுரை சோமு - 6

மதுரை சோமு 100
ஆர்.சுந்தர்ராமன்

2019. மதுரை சோமு அவர்களின் நூற்றாண்டு வருடம். 

[ நன்றி: ராஜு அசோகன் ]

சோமு நூற்றாண்டு: 2 பிப்ரவரி 1919-2019

 கர்நாடக இசை உலகம் ஏற்கெனவே அவரைக் கொண்டாடி வந்திருந்தாலும் "மருதமலை மாமணியே முருகையா' என்ற ஒரேபாடல் மூலம் உலகம் முழுவதும் அதிகம் அறியப்பட்டவர் மதுரை சோமு. தன்னுடைய கச்சேரிகளில் அதிகமான தமிழ்ப்பாடல்களையும் பாடி உலகெங்கும் உள்ள தமிழர்களது மனங்களில் இடம் பிடித்தவர்.

 சோமுவின் பிறப்பிடம் தஞ்சாவூர் மாவட்டம் சுவாமிமலை. அவர் படித்தது ஒன்பதாவது வகுப்பு மட்டுமே. பெற்றோர் சச்சிதானந்தம்பிள்ளை - கமலாம்பாள். இசை வேளாளர் மரபில் வந்தவர். அவர் தந்தைக்கு மதுரை நீதிமன்றத்தில் எழுத்தர் பணி கிடைத்ததால், குடும்பம் மதுரைக்கு புலம் பெயர நேர்கிறது. எனவே சோமுவின் இளமைக்காலம் முழுவதும் மதுரையிலேயே கழிந்தது. அவரது பெற்றோருக்கு சோமு கடைக்குட்டி. மூத்தவர்கள் 11 பேர். ஆனால் உயிருடன் இருந்து வாழ்ந்தவர்கள் அறுவர் தான். அவர்களுள் முத்தையா மற்றும் கல்யாணசுந்தரம் சகோதரர்கள் அந்நாளில் கால்பந்து வீரர்களாக டி.வி.எஸ். புட்பால் கிளப்பிற்காக விளையாடியவர்கள். இவர்கள் குத்துச் சண்டை வீரர்களும் கூட. அண்ணன்களோடு சேர்ந்து சோமுவும் குத்துச்சண்டை பயிற்சி எடுத்துக்கொண்டார். இதனால், சரீரம் கட்டுமஸ்தாக மாறியது. சாரீரமோ சறுக்கியது. ஒருவர் பாடிய பாடலைக்கேட்டு சுருதி சுத்தமாக திரும்ப பாடக்கூடியதிறமை பெற்றவரான சோமு, இசை மீது அதீத ஆசைகொண்டவராக இருந்தார். எனவே சாரீரம் சறுக்கியதில் இயல்பாக கவலை கொண்டார். ஆனால், மனம் தளரவில்லை. தன் திறமையைக் கொண்டு இசை உலகில் சாதனை புரிய வேண்டும், அதற்கு இசையின் அடிப்படைப் பாடங்களை முதலில் கற்றுக் கொள்ள வேண்டும் என்று முடிவு செய்து, மதுரை மீனாட்சிஅம்மன் கோயிலில் பட்டராக வேலைபார்த்த இசை வல்லுநர் சேஷ அய்யரிடம் இசை வகுப்புகளுக்குச் செல்கிறார்.

 இதற்கிடையே, சோமு வசித்த வீட்டிற்கு எதிர் வீட்டில்தான் நாதஸ்வர வித்வான் எம்.பி.என். சேதுராமன் மற்றும் பொன்னுசாமியின் வீடு இருந்தது. எனவே எம்.பி.என் சகோதரர்களின் தந்தை வித்வான் நடேச பிள்ளையிடம் நாதஸ்வரமும் பயில்கிறார். நாதஸ்வர வகுப்பில் நாதஸ்வரக் கருவியின் மேல் பகுதியில் உள்ள சீவாளி ஒரு முறை பலமாக சோமுவின் உதட்டை பதம் பார்த்து விடுகிறது. அதிலிருந்து நாதஸ்வரம் வாசிப்பது தடை பட்டுப்போனது. எனவே வாய்ப்பாட்டில் அவர் அதிக கவனம் செலுத்தத் தொடங்கினார்

 மதுரை மீனாட்சி அம்மன் கோயிலில் நவராத்திரி விழாவின் போது இசைக் கச்சேரிகள் ஆடி வீதியில் நடப்பது வழக்கம். அப்படி ஒரு நவராத்திரி விழாவில் சித்தூர் சுப்ரமணிய பிள்ளையின் கச்சேரி நடந்தது. சோமுவும் அவரது சகோதரரும் அங்கு செல்கின்றனர். கச்சேரியை அனுபவித்துக் கேட்ட மாத்திரத்தில், இவரிடம் தான் தாம் இசை பயில வேண்டும் என்று தோன்றி அந்த விருப்பத்தை தன்னுடையை அண்ணனிடமும் தெரிவிக்கிறார்.
 தம்பியின் ஆசையை பூர்த்திசெய்ய மதுரையிலிருந்து தம்பி சோமுவை அழைத்துக்கொண்டு சென்னை மயிலாப்பூர் முண்டகக் கண்ணியம்மன் கோயில் தெருவில் உள்ள சித்தூர் சுப்ரமணிய பிள்ளை வீட்டில் அவரை சந்தித்து விஷயத்தைக் கூறுகிறார் முத்தையா. சித்தூராரும் சோமுவை சிஷ்யனாக ஏற்றுக் கொள்கிறார். இதில் சுவாரஸ்யமான விஷயம் என்னவென்றால், இந்தக் காலத்தில் திரைப்பட இயக்குநர் சங்கருக்கு பத்து பதினைந்து உதவி இயக்குநர்கள் இருப்பது போல் அந்தக்காலத்தில் சித்தூராருக்கு மதுரை சோமு 26-ஆவது சிஷ்யன். 26 சிஷ்யர்களில் 10 பேர்கள் குருகுலவாசம். அதில் சோமுவும் ஒருவர்.

 வாரத்தில் ஒரு நாள்தான் வகுப்பு, மற்ற நாட்களில் காலையில் எருமை மாட்டை மயிலாப்பூரிலிருந்து எக்மோரில் உள்ள சித்தூராரின் பெற்றோர் வீடு வரை ஓட்டிச் சென்று பால் கறந்து கொடுத்துவிட்டு மீண்டும் மயிலாப்பூருக்கு எருமையை ஓட்டி வரவேண்டும். இதுதான் அவரது பணியாக இரண்டாண்டு காலம் இருந்துள்ளது.

 சித்தூரார் வீட்டில் தெலுங்குதான் பேசுவார்கள். அது சோமுவிற்கு வரப்பிரசாதமாக அமைந்தது. அதைக் கேட்டு கேட்டு அவரும் ஆறு மாதத்தில் தெலுங்கு பேசுவதற்குக் கற்றுக் கொண்டார். இரண்டு ஆண்டுகளுக்கு பிறகு, சோமுதான் நம்ம பெயரைக் காப்பாற்ற வந்த நாயகன் என சித்தூர் சுப்ரமணிய பிள்ளை முடிவு செய்து இசையில் உள்ள அனைத்து நுணுக்கங்களையும் அவருக்குக் கற்றுத் தருகிறார். அவர் பாடும் கச்சேரிகளுக்கு தம்பூரா வாசிப்பதற்கு கூடவே அழைத்துச் செல்கிறார். சிலநேரங்களில் கச்சேரியின் நடுவே 10 அல்லது 15 நிமிடஓய்வு நேரத்தில் சோமுவைப் பாட வைத்து அழகு பார்ப்பார். ஒரு நாள் சென்னை பாரிமுனை அரண்மனைக்காரன் தெருவில் உள்ள சபாவில் சித்தூராரின் கச்சேரி, அவருக்கோ காலையிலிருந்து ஒரே காய்ச்சல். மாலை வரை குறைந்தபாடில்லை. சபா செயலருக்கு வரமுடியாத காரணத்தைக் கடிதத்தில் எழுதி, சோமுவை அழைத்து, கடிதத்தையும் தம்பூராவையும் கொடுத்து, "காய்ச்சலாக இருப்பதால் எனக்கு பதிலாக நீ பாடிவிட்டு வா' என்று சொல்லி ஒரு ரிக்ஷாவில் அனுப்புகிறார். சோமுவுக்கோ ஒரு பக்கம் மகிழ்ச்சி. மறுபக்கம் பயம். சபாவில் சுப்ரமணிய பிள்ளை கச்சேரிக்கு பக்கவாத்யம் வாசிப்பதற்காக மிருதங்க ஜாம்பவான் பழநி சுப்ரமணிய பிள்ளையும் வயலின் வித்தகர் மாயவரம் கோவிந்தராஜ பிள்ளையும் காத்திருக்கிறார்கள்.

 சோமுவைக் கண்டவுடன், "என்னப்பா சோமு பிள்ளைவாள் வரவில்லையா?" எனக் கேட்க, அதற்கு, "அவருக்கு உடம்பு சரியில்லை, அதனால் என்னைப் பாடச் சொல்லி அனுப்பியுள்ளார்' என்கிறார் சோமு. பதிலைக் கேட்டதும், பக்கவாத்ய கலைஞர்கள் அதிர்ச்சியில் ஒருவரையொருவர் பார்த்துக் கொள்கிறார்கள். இருவரது மனங்களும் ஒரு சேர நாம் வயதில் சிறிய இந்த சோமுவுக்கா வாசிப்பது என்று நினைக்கிறது. இன்னொருபக்கம் வந்தது வந்துவிட்டோம் யாருக்கு வாசித்தாலென்ன என்றும் அவர்களுக்கு தோன்றுகிறது. "சரி வாசிச்சிருவோம்' என்று அன்றைய தினத்தில் சோமுவின் கச்சேரிக்கு ஜாம்பவான்கள் பக்க வாத்யம் வாசிக்கிறார்கள்.

 சோமுவுக்கு வாசித்தது இதுவே முதலும் கடைசியுமாகும் என்று இருவரும் பேசிக் கொள்வதைத் தன் காதால் கேட்ட சோமு மிகவும் மனம் வருந்தி தன்னுடைய குருநாதர் சித்தூராரிடம் அதைச் சொல்கிறார். சித்தூராரும், "இசை உலகில் இதெல்லாம் சகஜம்ப்பா' என்று ஆறுதல் வார்த்தை சொல்லி, "நீ பாட்டுக்கு உன் வேலையப் பாரு' என்று சோமுவை ஊக்கப்படுத்துகிறார்.
 குருகுல வாசத்தின் 11வது வருட முடிவில், சித்தூரார் சோமுவை அழைத்து, "நீ தனியாக கச்சேரி செய்யும் அளவிற்கு இசை நுணுக்கங்களைக் கற்றுக் கொண்டுவிட்டாய். எனவே மதுரைக்கு கிளம்பு' என்கிறார். ஆனால் சோமுவோ, "இன்னும் சில மாதங்கள் உங்களுடனே இருக்கிறேன்" என்கிறார். இப்படியே மேலும் இரண்டு வருடங்கள் சென்றன. 13 வருடங்களுக்கு பிறகு இதேபோல் ஒரு நாள் சோமுவை அழைத்து, கையில் மூன்று வேஷ்டிகள் மூன்று ஜிப்பாக்கள் மற்றும் ஒரு தம்பூராவைக் கொடுத்து, "தனியாக கச்சேரி செய்வதற்கு இதுதான் உனக்குச் சரியான நேரம், உனக்கு நல்ல எதிர்காலம் உண்டு' என்று வாழ்த்தி மதுரைக்கு அனுப்புகிறார்.

 மதுரை செம்பியன் கிணற்றுச்சந்தில் உள்ள காளியம்மன் கோவில் விழாவில் அரை மணி அளவிலான ஒரு சிறு கச்சேரியில் முதலில் பாடுகிறார். அதற்குப்பின் சோமுவின் முதல் முழுமையான இசைக் கச்சேரியாகச் சொல்லப்படும் அந்த நிகழ்வு திருசெந்தூர் முருகன் கோவில் சந்நிதியில் நடைபெறுகிறது. அங்கு பாடிய பிறகு சோமுவின் கச்சேரி வரைபடத்தில் ஏறுமுகம்தான்.

 மதுரை சோமு கொஞ்ச காலம் முறையாக நாதஸ்வரம் பயின்றதால், நாதஸ்வரத்தில் வாசிக்கும் ராக ஆலாபனை பாணிகளிலும் பாடுவார். டி.என். ராஜரத்னம் பிள்ளையின் வாசிப்பை இசைத்தட்டில் அடிக்கடி கேட்டதால் அவருடைய வாசிப்பின் தாக்கம் சோமுவின் கச்சேரியில் இருக்கும். பிரபல கர்நாடக சங்கீத வித்வான் ஜி.என். பாலசுப்ரமணியனும், செம்மங்குடி சீனிவாச அய்யரும் சோமுவின் சமகால சங்கீத வித்வான்கள். ஜி.என்.பி, செம்மங்குடி சீனிவாச அய்யர், மதுரை சோமு மூவருக்கும் ஓர் ஒற்றுமை என்னவென்றால், மூவருமே நாதஸ்வரம் வாசிப்பின் பாணியில் பாடக்கூடியவர்கள்.

 1961-ஆம் ஆண்டு சென்னையில் டிசம்பர் சங்கீத சீசன் களை கட்டியது. இந்தியாவின் பிரபல சங்கீத வித்வான்கள் பல்வேறு சபாக்களிலும் பாடிக் கொண்டிருக்கிறார்கள். இதில் மதுரை சோமுவும் தன்னை இணைத்துக் கொண்டு ஓய்வில்லாமல் பாடிக் கொண்டிருக்கிறார். சென்னை பிராட்வே தமிழ் இசைச் சங்கத்தின் சார்பில் ராஜா அண்ணாமலை மன்றத்தில் ஒரு கச்சேரி. முடியும் தறுவாயில் சோமு ரசிகர்களிடையே பேசுகிறார், "இன்றைக்கு, எட்டுக்கிரகங்கள் மகரத்தில் சந்திப்பதைப் பற்றி மக்கள் கவலையோடு பேசிக் கொள்கிறார்கள். அதைப்பற்றி கவலைப்பட வேண்டாம், தெய்வத்தின் அருளால் திருஞான சம்பந்த மூர்த்தி நாயனாரின் திருப்பாடல்கள் நமக்கு ஒரு ஆபத்தையும் ஏற்படுத்தாமல் பாதுகாத்து நிற்கும்' என்ற பொருள்பட,
 "எட்டுபேர் மகரத்தில்
 இணைவதாலே ஏதும் கெட்டுவிடுமோ என்று
 ஏங்காதே மனமே
 நட்டுவன் சிதம்பர நாதனிருக்கையில்
 ஞானசம்பந்தன் பாடல் நமக்குத் துணையுண்டு'
 என்ற வரிகளில் பல்லவி அமைத்துக் கொண்டு ராகம், தாளம், பல்லவியை மிக உருக்கமாக பாடி ரசிகர்களின் "மகரக்' கவலையை மறக்கச் செய்து சந்தோஷப்படுத்தினார். ரசிகர்களும் பலத்த கைத்தட்டலைப் பரிசாக அளிக்கின்றனர். இப்படி அந்தந்த சந்தர்ப்பங்களுக்கேற்ப பாடல்களைப் பாடும் திறமை பெற்றவர் சோமு. கல்யாண கச்சேரி என்றால், திருமணமான தம்பதிகளைப்பற்றி பாடி அனைவரின் கவனத்தையும் தன் மீது ஈர்ப்பார். கோயில் கச்சேரி என்றால் அது தனி விதம். சங்கீதகாரர்களுக்கு மத்தியில் ஒரு விதம்.

 பம்பாய் என்ற மும்பை சண்முகாநந்தா ஹாலில் சோமுவின் கச்சேரி, அதுவரை வட இந்திய ஹிந்துஸ்தானி பாடகரான படே குலாம் அலிகான் பாடல்களை இசைத்தட்டில் கேட்டுத்தான் பழக்கம். ஆனால், பம்பாய் கச்சேரியில் படே குலாம் அலிகான் கலந்து கொள்கிறார் என்பதைக் கேட்டவுடன் சோமுவின் மனத்தில் முகிழ்த்த மகிழ்ச்சி வண்ணத்துப் பூச்சிகளாகச் சிறகடிக்க ஆரம்பித்துவிட்டன. இதுதான் சந்தர்ப்பம் என்று நினைத்து குலாம் அலிகான் பாடும் ஹிந்துஸ்தானிப் பாடல்களை அவரது பாணியில் பாடினார். சண்முகாநந்தா அரங்கமே கரவொலியால் அதிர்ந்தது. குலாம் அலிகான் அதில் நெகிழ்ந்து உடனே மேடையேறி தான் வைத்திருந்த விலையுயர்ந்த சால்வையை சோமுவிற்கு அணிவித்து பெருமைப்படுத்தினார்.

 1978- இல் இசைக் கச்சேரிக்காக இலங்கை செல்கிறார் சோமு. அவருடைய மகனும் மிருதங்க வித்வானுமான சண்முகமும் உடன் செல்கிறார். சோமுவின் கச்சேரிக்கு முன்பாக நாதஸ்வர தவில் கச்சேரி நடை பெற்றுக் கொண்டிருந்தது. பொதுவாக மகா சிவராத்திரியன்றுதான் ஆங்காங்கே முன்னிரவில் கச்சேரி ஆரம்பித்து மறுநாள் காலை வரை இசைக் கச்சேரிகள் நடைபெறும். ஆனால், மதுரை சோமு கச்சேரி நடைபெறும் ஒவ்வொரு இரவும் மகாசிவராத்திரிதான். இலங்கையில் நடந்த கச்சேரியும் அப்படித்தான் நடந்தது. கச்சேரியின் நடுவே மதுரை சோமுவிற்கு "கீதாமிர்தவாரிதி' என்ற கெüரவப் பட்டத்தை வழங்கி சிறப்பு செய்கின்றனர் இலங்கைவாழ் இசைக் கலைஞர்கள்.

 ஏறத்தாழ 12 ராகங்களைத் தொகுத்து ராகமாலிகையாக இலங்கைவாழ் இசை ரசிகர்களுக்கு வழங்குகிறார். இறுதியாக "தெய்வம்' படப் பாடலான "கோடி மலைகளிலே கொடுக்கும்மலை எந்த மலை' என்ற விருத்தத்தை தன் காத்திரமான குரலில் பாட ஆரம்பிக்கிறார். ரசிகர்களின் கைத்தட்டலும் விசிலும் விண்ணை முட்டுகின்றன. இப்படியாக முதல் நாள் இரவு 10.00 மணிக்கு ஆரம்பித்த கச்சேரி மறுநாள் காலை 4.30 வரை நீடித்தது.
 மதுரை சோமுவிற்கு கோவையில் ஸ்ரீராமநவமியன்று நடந்த கச்சேரியும் மறக்க முடியாத ஒரு கச்சேரியாகும். சோமுவின் கச்சேரிக்கு முன்பாக ஜி.என்.பியின் கச்சேரி நடந்தது. அவர் கல்யாணி ராகத்தில் ராக ஆலாபனை செய்கிறார். சோமுவும் மிருதங்க வித்வான் சி.எஸ். முருகபூபதியும் முன் வரிசையில் அமர்ந்து கச்சேரியை ரசிக்கின்றனர். ஜி.என்.பி-யின் கச்சேரி முடிவதற்கு 15 நிமிடங்களுக்கு முன்பாக ஜி.என்.பி-யிடம் "கச்சேரிக்கு தயாராகி வருகிறேன்' என்று சொல்லிவிட்டு விடுதிக்கு கிளம்புகிறார்.
 விடுதிக்குச் சென்றவுடன், சோமு முருகபூபதியிடம், "அண்ணே ஜி.என்.பி கல்யாணியில மனுசன் அசத்திபுட்டாரே, எனக்கு பயமா இருக்கு, நான் வேற ராகத்தை எடுத்துப் பாடவா?' என்று கேட்கிறார். முருகபூபதியோ, "சோமு ஜி.என்.பி. பாடிய கல்யாணி ராகத்தையே அவர் பாணியிலயே உன் குரல்ல பாடு. நம்மளும் பட்டய கிளப்பிறலாம்' என்று ஊக்கப்படுத்துகிறார். முருகபூபதி சொன்னபடியே சோமு பாடுகிறார். கச்சேரி முடிந்தவுடன் ஜி.என்.பி சோமுவை கட்டித் தழுவி, "நீ இனிமேல் சித்தூர் சுப்ரமணிய பிள்ளை சிஷ்யன் இல்லடா, என்னுடைய சிஷ்யன்' என்று சொல்லி தன்னிடம் இருந்த சால்வையை அணிவிக்கிறார்.

 சென்னை கிருஷ்ணகான சபாவில் வழக்கமாக நடைபெறும் இசைவிழாவில் மதுரை சோமு கச்சேரி செய்துவிட்டார். இரண்டு நாட்கள் கழித்து செம்மங்குடி சீனிவாச அய்யரின் கச்சேரி, அவருக்கோ கச்சேரியன்று கடுமையான காய்ச்சல். சபாவின் அன்றைய செயலாளர் யக்ஞயராமனை தொலைபேசியில் அழைத்த செம்மங்குடி விஷயத்தைச் சொல்லி, அதற்கு பரிகாரமும் சொன்னார். அதாவது, "எனக்கு பதிலாக மதுரை சோமுவைப் பாட வையுங்கள்' என்றார். இதைக்கேட்ட செயலாளர், "நேற்று முன் தினம்தான் சோமு பாடினார்' என்று சொல்ல, "பரவாயில்ல, அதனாலென்ன, சோமுவை அனுப்புறேன். பாட அனுமதியுங்கள்" என்று சொல்லி அழைப்பைத் துண்டித்து, அடுத்து சோமுவை தொலைபேசியில் அழைத்து விஷயத்தைச் சொல்லி, "எனக்கு பதிலாக பாடிவிட்டு வா" என்கிறார். சோமுவும் சபா செயலாளர் சொன்ன விஷயத்தைச் சொல்ல, நான் சொன்னதை செய் என்று சொல்லி தனக்குப் பதிலாக சோமுவைப் பாட அனுப்புகிறார். செம்மங்குடி சீனிவாச அய்யருக்கு இருந்த ரசிகர்கள் கூட்டம் மதுரை சோமுவின் கச்சேரிக்கும் இருந்தது. கச்சேரி முடிந்ததும் செம்மங்குடிக்கு கொடுக்க வைத்திருந்த சன்மானத்தை அப்படியே மதுரை சோமுவிற்கு கொடுத்தார் சபா செயலாளர் மறைந்த யக்ஞராமன். மறுநாள், மதுரை சோமு செம்மங்குடி சீனிவாச அய்யரைச் சந்தித்து நமஸ்காரம் செய்து, "இது உங்களுக்குச் சேர வேண்டியது' என்று தன்னிடம் கொடுத்த சன்மானத்தைக் கொடுக்கிறார். செம்மங்குடியோ அதிலிருந்து ஒரு சிறு தொகையை எடுத்து சோமுவிற்கு கொடுக்கிறார். சோமுவோ அந்த சிறு தொகையை செலவழிக்காமல் தன்னுடைய டைரியில் நடந்ததை எழுதி அந்தத் தேதியின் பக்கத்தில் அதை வைத்து தான் இறக்கும்வரை தன் முன்னோடி தந்த சன்மானத்தை பாதுகாத்து வந்தார்.

 மதுரை சோமு ஓய்வில்லாமல் கச்சேரி செய்து வருகையில் வீட்டில் சோமுவிற்கு திருமணம் செய்ய வேண்டும் என்று முடிவு செய்து பெண் பார்க்கிறார்கள், சோமுவின் வளர்ச்சியில் மிகுந்த அக்கறை கொண்ட மிருதங்க வித்வான் ராமநாதபுரம் சி.எஸ். முருகபூபதி, சோமுவின் பெற்றோரிடம், தஞ்சை மாவட்டம் திருக்கருகாவூரில் தனக்கு தெரிந்த குடும்பத்தில் பெண் இருப்பதாகவும் எனவே திருக்கருகாவூர் சென்று பார்த்துவிட்டு வருவதாக சொல்லி புறப்பட்டார்.
 முருகபூபதி பார்த்துவிட்டு வருவதாக சொன்ன பெண்ணின் பெயர் சரோஜா, பெற்றோருக்கு ஒரே மகள். சரோஜாவிற்கு சொந்த ஊர் திருக்கருகாவூர் என்றாலும் வளர்ந்து படித்ததெல்லாம் சென்னையில். படித்தது வெலிங்டன் சீமாட்டி கல்லூரியில் பி.ஏ. ஹானர்ஸ். திருமணம் திருப்பரங்குன்றத்தில் கோலாகலமாக நடந்தேறியது. திருமணத்தன்று சோமுவின் குருநாதர் சித்தூர் சுப்ரமணியபிள்ளையின் கச்சேரியும் நடந்தது.

 திருமணத்திற்குப் பிறகு கணவர் சோமுவின் அறிவுரைப்படி சரோஜா தான் பார்த்துவந்த ஆசிரியர் வேலையை ராஜினாமா செய்துவிட்டு, இசையில் பிரபலமான தன் கணவருக்கும் அவரது குடும்பத்திற்கும் பணிவிடை செய்யும் குடும்பத்தலைவியாக மாறினார். சோமு தம்பதியருக்கு நான்கு குழந்தைகள். மூன்று ஆண்கள் ஒரு பெண்.

 சித்தூரார் காலமானதைக் கேள்விப்பட்டு மனதளவில் அதிர்ச்சியடைந்த சோமு, சித்தூராரின் மகனிடம் சென்று, "என் குருவான உன் தந்தைக்கு நீ செய்ய வேண்டிய ஈமக்கிரியைச் சடங்குகளை உனக்கு பதிலாக நான் செய்வதற்கு நீ அனுமதி தரவேண்டும்' என்ற உருக்கமான வேண்டுகோளை வைக்கிறார். சித்தூரார் மகனும் சம்மதம் தெரிவிக்கிறார். சித்தூராரின் அனைத்து ஈமக்கிரியை மற்றும் பத்து நாள் சடங்குகளையும் மகனின் ஸ்தானத்திலிருந்து செய்து முடிக்கிறார். ஈமக்கிரியை சடங்குகள் முடிகிறவரைக்கும் ஒப்புக்கொண்ட கச்சேரிகளை ரத்து செய்கிறார் சோமு. குருநாதருக்கு தன் வாழ்நாள் முழுவதும் பாடல்கள் மூலமும் பணிவிடை வாய்லாகவும் கடவுள் பக்தியை விட அதீத குருபக்தியை வெளிப்படுத்தியவர் மதுரை சோமு.

 மதுரை சோமுவிற்கு 1976ஆம் ஆண்டு மத்திய அரசு "பத்மஸ்ரீ' பட்டம் வழங்கி கெüரவிக்கிறது. இந்த மகிழ்ச்சியான செய்தியைக் கொண்டாடும் வகையில் சோமு பிறந்த ஊரான சுவாமிமலையில் பாராட்டு விழாவிற்கு ஏற்பாடு செய்யப்பட்டிருந்தது. விழாவை நாதஸ்வர வித்வான்கள் சுவாமிநாதன் மற்றும் பி.வி. காளிதாஸ் முன்னின்று நடத்தினர். அன்று யானை ஊர்வலம், பூர்ண கும்ப மரியாதை, இசை முழக்கம் என இசையில் சாதித்து "பத்மஸ்ரீ' பட்ட மண்ணின் மைந்தனை கொண்டாடினர் சுவாமிமலை மக்கள்.
 வெளிநாடு சென்று கச்சேரி செய்திருக்கிறார், இது தவிர வெளிநாடுகளுக்குச் சென்று கச்சேரி செய்யும் விருப்பம் மனதளவில் கூட எழவில்லை. இறுதிவரை இந்தியாவிலேயே கச்சேரி செய்ய விரும்பினார். குருநாதரையும் தாயையும் துதித்துப் பாடாத கச்சேரிகளே இல்லை. சோமுவின் கருத்தில், சவாலாகவும், ஒவ்வொரு நாளும் எதிர்நீச்சல் போடக்கூடிய இசைத்துறையில் தனது வாரிசுகளை முழுநேர இசைக்கலைஞனாக உருவாக்கவில்லை. இது பற்றி தனது வாரிசுகளுக்கு, "முதலில் பட்டப்படிப்பு முடியுங்கள், அடுத்து ஒரு நிரந்தர வேலையைத் தேடிக்கொள்ளுங்கள், பிறகு இசைத்துறையை பகுதி நேரத் தொழிலாக வைத்துக்கொள்ளுங்கள்' என்று அறிவுறுத்தியவர் மதுரை சோமு. இறுதியாக, தான் பாடும் கச்சேரிகளில் தமிழ் பாடல்களை அதிகமாகப் பாடி தாய்மொழியாம் தமிழை வளர்த்த தங்க மகன். எனவே மதுரை சோமுவின் நூறாவது பிறந்த நாளை தமிழர்களாகிய நாம் அனைவரும் குறிப்பாக இசைத்துறையில் இருப்பவர்கள் வருடம் முழுவதும் கொண்டாட வேண்டும். இதுதான் மதுரை சோமுவிற்கு தமிழர்கள் செய்யும் மகத்தான மரியாதை.


[ நன்றி : தினமணி கதிர்,  4 பிப்ரவரி 2019 ]

தொடர்புள்ள பதிவுகள்:

மதுரை சோமு

சங்கீத சங்கதிகள்

931. சங்கீத சங்கதிகள் - 139

மதுரை சோமு - 5

டிசம்பர் 9. மதுரை சோமு அவர்களின் நினைவு தினம்.

60-களில் இரண்டு கச்சேரிகளில் அவர் பாடிய பாடல்களின் பட்டியலை இங்கு முன்வைக்கிறேன்! 

கச்சேரிகளின் ஒலிப்பதிவுகளே நம் கையில் கிட்டினால் எப்படி இருக்கும் என்று ஏங்கத் தோன்றுகிறது, அல்லவா?

[ நன்றி: நண்பர் ராஜு அசோகன் ]

[  If you have trouble reading from an image, double click and read comfortably. Or right click on each such image and choose 'open image in a new tab' , Then in the new tab , and, if necessary, by using browser's  zoom facility to increase the image size also,  can read with comfort. One can also download each image to one's computer and then read with comfort using browser's zoom facility ]

தொடர்புள்ள பதிவுகள்:

மதுரை சோமு

சங்கீத சங்கதிகள்

சங்கீத சங்கதிகள் - 32

மதுரை சோமு - 4 

              

பிப்ரவரி 9.  மதுரை சோமு அவர்களின் பிறந்தநாள்.

மதுரை சோமு அவர்களை நானும், என் குடும்பத்தினரும் ரசிக்கத் தொடங்கினது : திருப்புகழ் மூலமாக. 50-களில் என்று நினைவு. திருச்சி ரேடியோ ‘தில்லைநகரிலிருந்து’ என்று ஒரு அருணகிரிநாதர் விழாவை ஒலிபரப்பும். அதில்தான் நாங்கள் ஆலத்தூர் சகோதரர்கள் போன்றோரின் முழு நீளத் திருப்புகழ் கச்சேரிகளைக் கேட்டு மகிழ்வோம். மதுரை சோமுவும் அங்குப் பாடுவார். 

நான் கடைசியாய் அவர் கச்சேரியை ...80-களில் --கேட்டதும் ஒரு திருப்புகழ் விழாவில் தான். வடபழனியில் ஒவ்வொரு ஆண்டும் ஆகஸ்ட் 15 - சமயம் அருணகிரிநாதர் விழா நடக்கும். பிரபல இசைக் கலைஞர்கள் வந்து பங்கேற்பர். அந்த விழாவில் ஒரு நாள் மதுரை சோமு பெயரை ...அவரைக் கேட்காமலேயே --போட்டு விடுவார்கள்! அவரும் தவறாமல் வந்து பாடுவார். அத்தகைய கச்சேரி ஒன்றுக்குத் தான் நான் அந்த வருஷம் சென்றிருந்தேன். நான் போனபோது சோமு அவர்கள்  திருப்புகழ்களில் வெவ்வேறு அங்க தாளங்களில்  ‘ராகம் தானம் பல்லவி’-கள் எப்படி மறைந்திருக்கின்றன என்று விளக்கிக் கொண்டிருந்தார். அதற்குப் பிறகு , ஒரு திருப்புகழைப் பவானி ராகத்தில் , அமைத்து, முதலில் ராகத்தை விஸ்தாரமாய் ஆலாபனை செய்தபிறகு திருப்புகழைப் பாடினார் . அன்றைய ஸ்பெஷல் அதுதான்!  அப்படி ஒரு அற்புதமான பவானியை நான் அதற்குப்பிறகு கேட்கவில்லை! முதலில் ‘கர்நாடக’ முறையில் ஆலாபனை: பிறகு, ‘கைகளை நாகசுரம் வாசிப்பது போல் சைகை செய்து, நாகசுரப் பாணியில் ரவைச் சங்கதிகள்; பிறகு , கையை தூக்கி ( வடக்கு என்ற பொருளில்) காட்டி, ஹிந்துஸ்தானி இசை முறையில் ! அடடா! அடடா! என்று நான் வியந்துகொண்டிருந்தபோது, குடும்ப நண்பர் , வடபழனி திருப்புகழ் சபைத் தலைவர் அமரர் சம்பந்தம் ஒரு பாட்டு முடிந்ததும் என்னை சோமுவுக்கு ஒரு மாலை போடச் சொன்னார். நானும் மாலை போட்டு விட்டு, சோமு அவர்களை ‘நீலமணி’ ராகத்தைக் ‘கொஞ்சம்’ ஆலாபனை செய்யச் சொல்லிக் கேட்டுக் கொண்டேன். எனக்கு ஒரு நப்பாசை: அவர் ஆலாபனை செய்துவிட்டுச்  ‘சடாரென்று’ ஒரு திருப்புகழை நீலமணியில் பாட மாட்டாரா என்று! அப்படி நடக்கவில்லை! நீலமணியில் ஓரிரு நிமிஷங்கள் நீந்திய சோமு , பிறகு ‘என்ன கவி பாடினாலும்’ என்ற ஆதிசேஷ ஐயரின் பாடலைப் பாடினார். 

மறக்கமுடியாத அனுபவம். அதுவே நான் கடைசியாகச் சோமு அவர்களைக் கேட்டது. 

இப்போது, 1989 -இல், தன் 70-ஆம் வயதில் மதுரை சோமு மறைந்தவுடன் விகடனில் வந்த ஒரு கட்டுரையைப் பாருங்கள் .

சங்கீத சிங்கம்

மதுரை சோமு பற்றி அவருடன் நெருக்கமாகப் பழகியவரும், இசை யிலும் எழுத்திலும் அறிஞருமான மீ.ப.சோமு சொன்னது...

"1941-ம் வருஷம், திருச்சி வானொலியில் நான் அறிவிப்பாளராகப் பணிபுரிந்துகொண்டிருந்த சமயம் அது. ஒரு நாள், சங்கீத மேதை சித்தூர் சுப்பிரமணியப் பிள்ளையின் நிகழ்ச்சியை அறிவிப்பு செய்யவேண்டிய பணி இருந்தது. சித்தூரார், தான் பாடவிருக்கும் கீர்த்தனையின் பெயரைச் சொல்லி விட்டு, தன் பின்னால் இருந்த ஒரு சிறுவனைப் பார்ப்பார். அந்தச் சிறுவன் மெல்லிய புன்னகை ஒன்றை உதிர்த்ததும், அடுத்த கீர்த்தனையின் பெயரைச் சொல்வார். இப்படி அந்தச் சிறுவன் அங்கீகரித்தவைதான் அன்று பட்டியலாகியது. சித்தூராரின் நம்பிக்கைக்குரிய அந்தச் சிறுவன் - சிஷ்யன்தான் மதுரை சோமு என்றழைக்கப்பட்ட சோமசுந்தரம்.

தனது குரு உட்கார இடம் பண்ணித் தருவதிலிருந்து, அவருக்கு வியர்க்கும்போது மேல் துண்டால் துடைத்துவிடுவதுவரை சோமுவின் குருபக்திக்கு எல்லையே கிடையாது.

ஒரு நாள், வானொலியில் கச்சேரி செய்ய குருவுடன் வந்த சோமுவையே கேட்டேன்... "நீங்கள் ஒரு தனிக் கச்சேரி செய்யவேண்டியது தானே?' என்று. அதற்கு சோமு, 'தலை இருக்க வால் ஆடக்கூடாது, சார்!' என்று மிகவும் அடக்கத்துடன் கூறினார். இது நடந்து சில காலம் கழித்து, ஒரு நாள் என்னைப் பார்க்க, சோமு வீட்டுக்கு வந்தார். 'நான் இப்போது தனிக் கச்சேரி செய்கிறேன். என் கச்சேரியைக் கேட்க நீங்கள் வரவேண்டும்' என்று அழைத்தார். அவர் கச்சேரியைக் கேட்டு மெய்ம்மறந்தேன். வெறும் தம்புரா மீட்டி, புன்சிரிப்பை மட்டுமே வெளிக்காட்டிக் கொண்டிருந்த அந்த இளைஞனுக்குள் எப்பேர்ப்பட்ட அற்புதமான இசை வல்லமை குடிகொண்டிருந்தது என்பதை உணர்ந்தேன். இதை மனத்தில் கொண்டு, அவரை 'இசை பயில்வான்' என்று நான் குறிப்பிட்டதை அவர் மிகவும் ரசித்தார். பலவீனம் என்பதே இல்லாத சத்தான குரல்; எவ்வளவு உச்சத்துக்குப் போனாலும் அந்தக் குரல் சன்னமடையாது. கீச்சிடாது. அதேசமயம் கீழே இறங்கும்போது, சுருதி பிசகாமல் ஸ்வர ஸ்தானத்தை தொட்டு நின்று பேசும்.

1963-ல் இருந்து சென்னை தமிழிசைச் சங்கத்தின் நிபுணர் குழுவில் என்னோடு உடன் அங்கம் வகித்துப் பணியாற்றினார் மதுரை சோமு. 'இசைப் பேரறிஞர்' பட்டத்துக்குக் கலைஞர்களைத் தேர்ந் தெடுப்பது முதல் விழா நிகழ்ச்சிகளை அமைப்பதுவரை எல்லா செயல்களிலும் என்னோடும், தமிழிசை சங்க நிர்வாகிகளோடும் கருத்து ஒருமித்து மிகவும் பண்பாட்டுடன் நடந்துகொள்வார்.

மதுரை சோமு இசைப் புலமை, குரல் வளம் இரண்டும் இணைந்த ஒரு சிங்கம். அவர் கர்னாடக ரசிகர்களுக்கும் பாடினார்; ஜனரஞ்சக ரசிகர்களுக்கும் பாடினார். அவர் மறைந்துவிட்டாலும், கேட்பவர்களுக்குப் பொருள் புரியும்படி பாடிய அவருடைய கம்பீரமான குரல் நம் காதில் ஒலித்துக்கொண்டே இருக்கும்!"

[ நன்றி : விகடன் ]

      

கடைசியாக, 2004 -இல் தினமணி கதிரில் வந்த ஒரு கட்டுரை .

[  If you have trouble reading from an image, double click and read comfortably. Or right click on each such image and choose 'open image in a new tab' , Then in the new tab , and, if necessary, by using browser's  zoom facility to increase the image size also,  can read with comfort. One can also download each image to one's computer and then read with comfort using browser's zoom facility ]

தொடர்புள்ள பதிவுகள்:

மதுரை சோமு

சங்கீத சங்கதிகள்

சங்கீத சங்கதிகள் - 30

மதுரை சோமு - 3 

( தொடர்ச்சி)

பிப்ரவரி 9. மதுரை சோமு அவர்களின் பிறந்த தினம்.

சோமுவின் நாதஸ்வரக் கச்சேரி 

“ அண்ணாமலையான் சந்நிதியில் சோமு ஒரு நாதஸ்வரக் கச்சேரி செய்தார். என்ன விழிக்கிறீர்கள்? அது நிச்சயமாக  சாரீரமே இல்லை. அது என்ன கல்யாணி , ஐயா? சோமுவின் தனி விசேஷம் என்னவென்றால், அவர் சாரீரம் வல்லின மெல்லினப் பிரயோகங்களில் வல்லமை கொண்டது. அதற்கு மேலாக அவர் இசை தியாகராஜர் சொன்னது போல், நாபியிலிருந்து கிளம்பி இருதயக்கமலத்தில் தோய்ந்து, கண்டம் வழியாக நாதப் பிரவாகமாய் வரும். கடனிழவே என்று பாடும் துர்க்குணம் அவருக்கு அறவே கிடையாது. ஆங்கிலத்தில் ஆடியன்ஸ் பார்டிஸிபேஷன் ( Audience Participation )  என்று சொல்வார்கள். அவையோரை அணைத்துக் கொண்டு, அக்கம் பக்கத்திலிருக்கும் பக்க வாத்தியக்காரர்களை ஊக்குவித்து கிட்டத்தட்ட ஒரு கிரிக்கெட் மாட்ச் பார்க்கும் சூழ்நிலையை உண்டாக்கி விடுவார். இதோ, சாரீரம் தென்றல் காற்றுப் போல வீசுகிறது; மறு நிமிடம் அசைந்தாடுகிறது.அதன் பின்னர் ஆடிக் காற்று - பின் புயல் - அதன் பின் சூறாவளி. ஸ்வரங்கள் இரண்டு மூன்று கோர்வைகளாய்க் கைகோத்துக் கொண்டு அதிதுரித காலத்தில் ஸர்க்கஸ் வேலைகள் செய்கின்றன. நாம் தான் நாற்காலி நுனியில் உட்கார வேண்டியிருக்கிறது. அவர் அநாயாசமாகச் செய்கிறார். 

அன்று பாடிய கல்யாணி இந்த ரகத்தைச் சேர்ந்தது தான். ஒரு முழு நீள நாதஸ்வரக் கச்சேரி கேட்பது போன்ற பிரமை தட்டியது. அவையில் உற்சாகம் கரைபுரண்டோடியது. வயலின் கந்தசாமியை ஊக்குவித்து, ஜாம் ஜாம் பண்ணி விட்டார். இன்றைய கச்சேரி வித்வான்களின் அமுக்கும் மனப் பான்மையை ஒப்பிட்டுப் பார்க்கும் போது சோமு ஒரு தனிப் பிறவி “               

             --- சுப்புடு, விகடன், 1976 [ “இசை நாட்டிய விமர்சனம் “ நூல் ]

மதுரை சோமு அவர்களுக்கு 1984 -இல் இண்டியன் ஃபைன் ஆர்ட்ஸ் ஸொசைடியின் ‘சங்கீத கலா சிகாமணி ‘ விருது கிடைத்தது. அந்தச் சமயம் ‘கல்கி’யில் வெளியான ஒரு கட்டுரை இதோ!

சிகாமணி சோமு

[ நன்றி: கல்கி ]

இன்னொரு கச்சேரி விமர்சனக் கட்டுரையைப் பாருங்கள் !

அவசியங்களும் அனாவசியங்களும் !

‘கல்கி’யில் வந்த இன்னொரு கட்டுரை!

ஓடும் ரயிலில் ஒரு நேயர் விருப்பம் 

( தொடரும் )

[  If you have trouble reading from an image, double click and read comfortably. Or right click on each such image and choose 'open image in a new tab' , Then in the new tab , and, if necessary, by using browser's  zoom facility to increase the image size also,  can read with comfort. One can also download each image to one's computer and then read with comfort using browser's zoom facility ]

தொடர்புள்ள பதிவுகள்:

மதுரை சோமு

சங்கீத சங்கதிகள்

சங்கீத சங்கதிகள் - 27

மதுரை சோமு - 2 

( தொடர்ச்சி ) 

1971 -ஆம் ஆண்டு. தமிழிசைச் சங்கத்தின் ‘இசைப் பேரறிஞர்’ என்ற விருதைப் பெறுகிறார் மதுரை சோமு. அவருடைய அகாடமிக் கச்சேரியைக் கேட்டு  “சோ என்று கொட்டும் சோமு” என்று தினமணி கதிரில் எழுதுகிறார் சுப்புடு.  அந்த விமர்சனத்தில் ஒரு பகுதி :

“ சோமு பாடிய காம்போஜி அப்படியே நேரே, இருதயத்தைத் தொட்டது. அது என்ன மூர்ச்சனை ஐயா? காந்தாரத்தை வல்லின மெல்லினமாய் நாதஸ்வர பாணியில் கொடுக்கும்போது மெய் சிலிர்த்து விட்டது. அதே மாதிரிக் குழைவுகள் கொடுக்கும் பொழுது ஆனந்தமாக ‘மஸாஜ்’ பண்ணிக் கொள்வதுபோல் இருந்தது. சோமு ராகத்தை ஒரு பூரண சொரூபமாய் உருவகப் படுத்திக் கொள்கிறார். அவர் கண்ணோட்டமும், கைவீச்சும் அத்தைகைய பிரமையை நமக்கு உண்டுபண்ணுகின்றன. காம்போஜியில் பல இடங்களில் அவர் அந்த ராகத்துடனே இரண்டறக் கலந்துவிட்ட உணர்வு ஏற்பட்டது. அவருக்கு சங்கீதம் சத்யப் பிரமாணம். “  

அடுத்து, தனக்குப் பிடித்த ஆறு ராகங்களைப் பற்றிச் சோமு அவர்கள் சொல்வதைக் கேளுங்கள்!

பிரபல எழுத்தாளர் ‘மணியன்’ சோமுவின் தீவிர ரசிகர். அவருடைய ஒரு கட்டுரை இதோ:

[ நன்றி: ”இதயம் பேசுகிறது”, ராஜு அசோகன் ] 

கடைசியாக , சிவாஜி கணேசன் -சோமு அவர்களின் ஒரு சந்திப்பைப்

பற்றிய தகவலுடன் , இம்மடலை முடிக்கிறேன்!

[ நன்றி: சினிமா எக்ஸ்ப்ரஸ், ராஜு அசோகன் ] 

பி.கு. : 

இந்தச்  சிவாஜி -சோமு சந்திப்புப் பற்றிய  தகவலையும், ம்துரை சோமு - ராமாயணம் படத் தொடர்பு பற்றியும் மேலும் விவரமாக ( சரியாக?)  கீழ்க்கண்ட சுட்டியிலிருந்து அறியலாம்:

“ ‘சம்பூர்ண ராமாயணம்’ திரைப்படத்தில் ஸி.எஸ்.ஜெ., நமது இன்றைய பாடல் உட்பட இரண்டு பாடல்கள் பாடியிருப்பார். அவை இரண்டையும் முதலில் மதுரை சோமுவைப் பாடவைத்துப் பதிவும் செய்திருந்தார்கள். (அந்தப் பாடல் பதிவின் போது அங்கிருந்த சிவாஜி, சோமுவின் பாடலில் மனதைப் பறிகொடுத்து, தன் கழுத்திலிருந்த தங்கச் சங்கிலியைக் கழற்றி சோமுவுக்கு அணிவித்தார்! அப்போதைய ’பேசும் படம்’ திரைப்பட மாத இதழில் புகைப்படம் கூட வந்தது.) ஆனால், திரைப்படத்தில் ராவணனாக நடித்திருந்த டி.எஸ்.பகவதியின் குரலுக்கு ஏற்புடையதாக இல்லை என்பதால் மீண்டும் ஸி.எஸ்.ஜே குரலில் பதிவு செய்யப் பட்டது. (இந்தத் தகவலை, பின்னாளில் ஒரு கச்சேரியின்போது மதுரை சோமுவிடமிருந்தே அறிந்துகொண்டேன்.) ”

http://krishnathreya.blogspot.com/2012/04/blog-post_30.html

என்ற சுட்டியைச் சொடுக்குங்கள்.

( தொடரும் )

[  If you have trouble reading from an image, double click and read comfortably. Or right click on each such image and choose 'open image in a new tab' , Then in the new tab , and, if necessary, by using browser's  zoom facility to increase the image size also,  can read with comfort. One can also download each image to one's computer and then read with comfort using browser's zoom facility ]

தொடர்புள்ள பதிவுகள்:

மதுரை சோமு

சங்கீத சங்கதிகள்

சங்கீத சங்கதிகள் - 25

மதுரை சோமு - 1 

[ நன்றி: விகடன், 1946. ஓவியம்: சில்பி ? ] 

”சோமுவின் சாரீரத்தில் ஓர் ஆச்சர்யம். ஆரம்பிக்கும்போது புகைச்சலாய் இருக்கும். ஆனால், போகப் போக அதிலிருந்து வெளிவரும் நாத அலைகள் அவர் எவ்வளவு தலை சிறந்த நாதோபாசகர் என்பதை நிமிஷத்துக்கு நிமிஷம் பறை சாற்றும். ஊசிப் பிரயோகங்களைத் தொடர்ந்து உலக்கைப் பிரயோகங்கள் வரும். திடீரென்று கைகளை நாதஸ்வர வித்வான் மாதிரி வைத்துக் கொண்டு ராஜரத்தினத்தை கண்முன் கொண்டுவந்துவிடுவார்.” 
       ---’சுப்புடு’ , 1978. [ நன்றி: ராஜு அசோகன் ]

கர்நாடக இசை மேதை மதுரை சோமு அவர்களைத் தெரியாத இசை ரசிகர்கள் இருக்க முடியாது/ இருக்கக் கூடாது!  என்று நினைக்கிறவன் நான். ஆனால், இணையத்தில்  அவரைப் பற்றி அதிகம் தகவல்கள், கட்டுரைகள் இல்லையே என்ற ஓர் ஆதங்கம் திடீரென்று தோன்றியது ; ‘சரி, இதற்கு ஏதாவது ஒரு முடிவு கட்டி விட வேண்டியது தான்’ என்று நண்பர் ராஜு அசோகனைத் தொடர்பு கொண்டேன். தீவிர சோமு ரசிகரான அவர் மனமுவந்து தந்த சில கட்டுரைகளை மெதுவாக, தொடர்ந்து உங்களுடன் பகிர்ந்து கொள்ள நினைக்கிறேன். அவருக்கு என் மனமார்ந்த நன்றி! கூடவே என்னிடமும் இருக்கும் சில குறிப்புகளையும், கட்டுரைகளையும் சேர்க்கிறேன்.

முதலில், மதுரை சோமு அவர்களைப் பற்றி என்னிடம் இருக்கும் பழைய குறிப்பு ஒன்று. 1946-ஆம் ஆண்டு ‘ஆனந்த விகடன்’ ’ஆடல் பாடல்’ பத்தியில் வந்த விமர்சனமும், படமும். ( ஆம், அப்போதே விகடன் அவரைக் ‘கவனித்திருக்கிறது’! ) ( இதற்கு முன்பே - 44,45 -இல் -- விகடனின் ‘ரேடியோ எப்படி’ என்ற பத்திகளில் சோமு அவர்களைப் பற்றிய குறிப்புகள் உள்ளன; அவற்றைப் பின்பு வேறு மடலில் இடுகிறேன். அந்தப் பக்கங்களின் மிகவும் சேதமடைந்த நிலையே காரணம்! )

ஆடல் பாடல்

வித்வத் சபையில் பாடிய இளம் வித்வான்களில் சோமசுந்தரத்தின் பாட்டு எல்லாருடைய விசேஷ கவனத்தையும் கவர்ந்திருக்கும். ஸ்ரீ சோமசுந்தரத்துக்கு வெகு அபூர்வமான சாரீரம் வாய்த்திருக்கிறது. அதில் பேசும் துரித கால பிர்க்காக்கள் அழுத்தமும் அழகும் கொண்டு நம்மை பிரமிக்கச் செய்துவிடுகின்றன. அத்துடன் அவருக்குச் சிறந்த ஞானமும் விசேஷ மனோதர்மமும் இருப்பதும் அன்றைய கச்சேரியில் தெரிந்தது. இந்த வசதிகளையெல்லாம் அவர் பாகுபாடாகப் பயன்படுத்திக் கொள்ளவும் செய்கிறார். அவருடைய ராக ஆலாபனைகளெல்லாம் விசேஷபாவத்தோடும் சிறந்த கல்பனைகளோடும் பிரகாசிக்கின்றன. உதாரணமாக, அவர் ஆலாபனை செய்த கல்யாணியையும் ஷண்முகப்பிரியாவையும் சொல்லலாம். நடநாராயணி கல்யாண வசந்தம், அஸாவேரி போன்ற அபூர்வ ராகங்களையும் அவர் மிக்க திறமையோடு ஆலாபனை செய்ததைப் பாராட்ட வேண்டும். கீர்த்தனைகளையும் அவர் வெகு கச்சிதமாகப் பாடுகிறார். சுருங்கக் கூறினால், ஒரு பெரிய வித்வானுக்கு வேண்டிய எல்லா யோக்யதாம்சங்களும் இவரிடம் இருப்பதைக் காண்கிறோம்.

[ நன்றி: விகடன் ]

இரண்டாவதாக,  சோமு அவர்களைப் பற்றிய ஒரு வாழ்க்கைக் குறிப்பு; 1988- இல் அவருக்கு நடந்த ஒரு பாராட்டு விழாவில் வெளியிடப்பட்ட  மலரில் வந்த கட்டுரை.

[ நன்றி : ராஜு அசோகன் ] 

மூன்றாவதாக, தன் குருவுடன் தான் செய்த கடைசிக் கச்சேரி பற்றிச் சோமு அவர்களின் சில நினைவுகள்;

[ நன்றி : ராஜு அசோகன் ] 

 ( தொடரும் )

[  If you have trouble reading from an image, double click and read comfortably. Or right click on each such image and choose 'open image in a new tab' , Then in the new tab , and, if necessary, by using browser's  zoom facility to increase the image size also,  can read with comfort. One can also download each image to one's computer and then read with comfort using browser's zoom facility ]

தொடர்புள்ள பதிவுகள்:

மதுரை சோமு

சங்கீத சங்கதிகள்

சங்கீத சங்கதிகள் - 18

இசை - போட்டேன் அசை! 

வாலி

ஜூலை 18, 2013 அன்று காலமான ‘காவியக் கவிஞர்’ வாலிக்கொரு நினவாஞ்சலியாக அவர் கர்நாடக சங்கீத வித்வான்கள் பற்றி  எழுதிய இரு கட்டுரைகளையும், ஒரு கவிதைப் பகுதியையும் இங்கிடுகிறேன். 

சிறுவயதில் அவருக்கும் சில சங்கீத வித்வான்களுக்கும் இருந்த தொடர்பு, முக்கியமாக ஒரு வித்வானிடமிருந்து அவர் பெற்ற ஓர் அறை ...இவற்றைப் பற்றி முதல் கட்டுரையில் விவரிக்கிறார் வாலி. ( இது  ‘ நினைவு நாடாக்கள்’ என்ற தலைப்பில் ’ஆனந்தவிகடனி’ல் வாலி எழுதிய தொடரில் வந்த ஒரு கட்டுரை) 

முதல் கட்டுரை: 

நான் வாங்கிய அறை!

ஓவியம்: மணி 

  

முரசொலி’யில் ஒரு செய்திக் கட்டுரை. 'சங்கீத வித்வான்கள் சபையில் பாட - எத்துணையோ தமிழ்ப் பாடல்கள் இருக்கின்றன; இன்ன இன்னார் இயற்றிஇருக்கிறார்களே!’ என்று -

தமிழ்ப் பாடல்கள் யாத்துளோர் பட்டியலில் அடியேன் பேரும் இருந்தது!

கட்டுரையை எழுதிய பெரியவர் பெயர் திரு.திருவாரூர் தியாகராஜன். 'சின்னக் குத்தூசி’ என்றால் சகமறியும்!

இந்தக் கட்டுரை வெளியான இதழை நான் படித்துக்கொண்டிருக்கையில் -

ஓராண்டு என்னிலும் மூத்த ஒரு சங்கீத வித்வான் - என் பால்ய நண்பர் - என் வீட்டுக்கு வந்தார். என்னைப்பற்றிய தகவலை, அவரிடம் படிக்கக் கொடுத்தேன்.

'ஓய்! நீர் கீர்த்தனங்கள் எழுதுவீரா என்ன?’ என்று சற்று நமட்டுச் சிரிப்புடன் வினவினார்.

சங்கீத பூஷணம் தாராபுரம் திரு.சுந்தரராஜனின் ஸ்வரக் குறிப்புகளோடு - என் கீர்த்தனங்களை -

கலைஞன் பதிப்பகம் வெளியிட்டு இருப்பதை அவரிடம் காட்டினேன்.

அதைப் புரட்டிக்கொண்டே வந்த என் நண்பர் -

''ஓய்! உம்ம பாட்டா இது? நான் அந்தக் காலத்துல மதுரை சோமு; எம்.எல்.வசந்தகுமாரி; கல்யாணராமன்; சுதா ரகுநாதன்; பாம்பே ஜெயஸ்ரீ - இப்படி இந்தக் காலம் வரைக்கும் இந்தப் பாட்டைக் கேட்டு இருக்கேன்! அவ்வளவு ஏன்? நானே என் கச்சேரீல இதை ரொம்ப நாளா 'வலஜி’யில பாடிண்டிருக்கேன்; உம்ம பாட்டூன்னு - இப்பதான் தெரிஞ்சுண்டேன்; கிண்டலாப் பேசிட்டேன்; க்ஷமிக்கணும்!'' என்று கைகளைக் கூப்பினார்.

நண்பர் குறிப்பிட்ட என்னுடைய பாட்டு இதுதான்...

'கூவியழைத்தால்

குரல் கொடுப்பான்; பரங்-

குன்றமேறி நின்று

குமரா வென்று...’ ( 1)

வெகு காலமாக ஒரு வெகுஜன அபிப்பிராயம் இருக்கிறது - கோடம்பாக்கத்திற்கும் திருவையாறுக்கும் ஏழாம் பொருத்தம் என்று.

அது ஜமுக்காளத்தில் வடிகட்டிய பொய்.

கோவையில் 'வாணி பிலிம்ஸ்’ என்று ஒரு படக் கம்பெனி. அதன் பாகஸ்தர்கள் யார் தெரியுமா?

வயலின் வித்வான் டி.சௌடய்யா;

புல்லாங்குழல் வித்வான் டி.ஆர். மகாலிங்கம்;

மற்றும்

மஹா வித்வான் செம்பை திரு.வைத்யநாத பாகவதர்!

திருமதி. கே.பி.சுந்தராம்பாளும், மகாராஜபுரம் திரு.விஸ்வநாதய்யரும் நடித்த படம் 'நந்தனார்!’.

திருமதி. எம்.எஸ். சுப்புலட்சுமியும் திரு.ஜி.என்.பாலசுப்ரமணியமும் சேர்ந்து நடித்த படம் 'சகுந்தலை!’.

திருமதி. என்.ஸி.வசந்தகோகிலம் கதாநாயகியாக நடித்த படம் 'ஹரிதாஸ்!’.

திரு.பாபநாசம் சிவன் நடித்த படங்கள் 'தியாக பூமி’; 'பக்த குசேலா’; திரு.எம்.எம். தண்டபாணி தேசிகர் நடித்த படம் 'நந்தனார்’.

திருமதி. எம்.எல்.வசந்தகுமாரியும், திரு. பி.யூ.சின்னப்பாவும் சேர்ந்து நடித்து, சிறிது தூரம் வளர்ந்து நின்று போன படம் 'சுதர்ஸன்’.

திரு.பாலமுரளி கிருஷ்ணா நாரதராக நடித்தது மட்டுமன்றி பல படங்களில் பாடிஇருக்கிறார்!

திரு.மதுரை டி.என்.சேஷகோபாலன், திரு.குன்னக்குடி படத்தில் கதாநாயகன்!

நாதஸ்வர மேதை திரு.டி.என்.ராஜரத்தினம் பிள்ளை கதாநாயகனாக நடித்த படம் 'கவிராஜ காளமேகம்’.

திருமதி. டி.கே.பட்டம்மாள் நிறைய படங்களில் பாடியிருக்கிறார்.

திரு.வி.வி.சடகோபன் கதாநாயகனாக நடித்த படம் 'மதன காமராஜன்’.

இப்படி சொல்லிக்கொண்டே போகலாம். சின்ன வயதிலிருந்தே எனக்கு சங்கீத வித்வான்களோடு, நிறையப் பரிச்சயம் உண்டு!

ஸ்ரீரங்கத்தில்தான் இருந்தார், மகாவித்வான் வயலின் திரு. மருங்காபுரி கோபால கிருஷ்ணய்யர்.

வருஷா வருஷம் தன் வீட்டில், தியாகராஜ உற்சவம் நடத்துவார். வந்து பாடாத வித்வான்களே இல்லை!

நான்தான் அங்கு எல்லாருக்கும் எடுபிடி.

சித்தூர் சுப்பிரமணியப் பிள்ளையைக் காவேரிக்கு அழைத்துப் போய், ஸ்நானம் செய்விப்பது; மதுரை மணி அய்யரின் துணிகளை இஸ்திரி போட்டுவைப்பது; ஜி.என்.பி-யின் பொடி டப்பாவில் - நாசிகா சூர்ணத்தை, அவ்வப்போது நிரப்புவது; கும்பகோணம் ராஜமாணிக்கம் பிள்ளைக்கு 'டிகிரி காபி’ ஏற்பாடு செய்வது...

இத்யாதி; இத்யாதி!

ஒரு சங்கீத வித்வான் மீது எனக்கும், என் ஸ்ரீரங்கத்து நண்பன் விட்டலுக்கும் பயங்கரப் பிரியம்.

அவர், திருச்சிப் பக்கம் கச்சேரிக்கு வந்தால் எனக்குக் கடிதம் போடுவார். நானும் நண்பன் விட்டலும், திருச்சி அசோகா ஹோட்டலுக்குச் சென்று அவரோடு அக்கம்பக்கத்து ஊர்க் கச்சேரிகளுக்குச் செல்வோம்.

என்னுடைய எத்துணையோ பாடல்களை அவர் இசையமைத்து விஸ்தாரமாகக் கச்சேரியில் பாடுவதுண்டு.

நான், நாளாவட்டத்தில் அவருக்குத் தம்புரா போடலானேன்.

ஒருமுறை விடியற்காலை வரை அவரது கச்சேரி, திருக்காட்டுப்பள்ளி என்னும் ஊரில் நடந்தது. ஜே ஜே என்று கூட்டம்.

ஒரு கட்டத்தில், நான் லேசாகக் கண்ணயர்ந்து - தம்புராவோடு அவர்மீது சாய்ந்து விட்டேன்.

அப்போதுதான், அவர் அனுபவித்து 'ராகம் தானம் பல்லவி’ பாடிக்கொண்டிருந்தார். என் செயலால், சுதி கலைய...

'பளீர்’ என்று என் கன்னத்தில் ஓர் அறை விட்டார். எனக்குப் பொறி கலங்கியது. அந்த வித்வான் குஸ்தி பழகியவர்!

நாள்கள் நகர்ந்தன. நான், சினிமாவில் பிரபலமாகிவிட்டேன்; நண்பன் விட்டல், எம்.ஜி.ஆர். மந்திரி சபையில் மந்திரியாகி விட்டான். திருச்சி சௌந்தரராஜனின் செல்லப் பெயர்தான் விட்டல்!

பல்லாண்டுகளுக்குப் பின் - அந்த சங்கீத வித்வான் -

'சஷ்டி விரதம்’ என்னும் தேவர் பிலிம்ஸ் படத்துக்காகப் பாட வந்திருந்தார். என் பாட்டுதான் அது.

என்னைப் பார்த்ததும் - என் கன்னத்தில் அவர் அறைந்தது நினைவுக்கு வந்து - மிகவும் கூச்சப்பட்டார். நான், அவரது கைகளைப்பற்றிக் கொண்டு சொன்னேன்.

'அண்ணே! நீங்க மஹாவித்வான்; சங்கீத சாகரம். இன்றும் நீங்கள் விடிய விடியப் பாடினால் - கூட்டம், கொட்டகை பிதுங்க நிற்கிறது. உங்கள் பேர் சொன்னாலே, சென்னை சபாக்கள் சந்தோஷித்துச் சிலிர்க்கின்றன!

உங்கள் கையால், பல ஆண்டுகளுக்கு முன் வாங்கிய ஓர் அறைதான் -

நான் பாட்டுத் துறையில் இவ்வளவு பிரபலமாகக் காரணம்!’

- என்று அவர் பாதங்களைத் தொட்டு வணங்கினேன்.

உடனே, என்னை அள்ளி எடுத்து உச்சி முகர்ந்தார் -

மகா மகா வித்வான்

திரு. மதுரை சோமு அவர்கள்!

[ நன்றி : விகடன் ] 

இரண்டாம் கட்டுரை: 

’விகடன்’ கட்டுரையில் வாலி குறிப்பிடும் அவருடைய இசைப்பாடல் நூலின் முகப்பு இதோ:

95-இல் கலைஞன் பதிப்பகம் வெளியிட்ட இந்நூலில் 15 பாடல்கள் ஸ்வரக் குறிப்புகளுடன் இருக்கின்றன.  சங்கீத வித்வான்கள் பத்மஸ்ரீ கே.வி. நாராயணஸ்வாமி யும், சங்கீத கலாநிதி தஞ்சாவூர் எம்.தியாகராஜனும் இந்நூலிற்கு அணிந்துரைகள் கொடுத்திருக்கின்றனர். 

( ஆனால் , இந்நூலில் “கூவி அழைத்தால்” என்ற பாடலுக்குத் தாராபுரம் சுந்தரராஜன் அமைத்த ராகம் உதயரவிசந்திரிகா! இப்போதோ, வாலியின் கட்டுரையில் குறிப்பிட்டபடி, வலஜியில் தான் அது பிரபலமாகப் பாடப் படுகிறது! இதற்கு ‘வலஜி’யில்  முதலில் மெட்டமைத்தவர் யாரென்று எவருக்காவது தெரியுமா?  ) 

இன்று பலபேருக்குத் தாராபுரம் சுந்தரராஜன் யாரென்றும் தெரியாது. நல்ல குரல்வளமும், இசைஞானமும் வாய்த்திருந்தவர் அவர்; எங்கள் வீட்டில் நடந்த ஒரு கல்யாணத்திற்கு அவர் கச்சேரியை வைத்திருந்தோம்.  எல்லோரும் அவர் இசையை மிகவும் ரசித்தனர். இவர் வாலியின் பால்ய சிநேகிதர். இவரைப் பற்றி வாலி இந்நூல் முன்னுரையில் சிறப்பாக எழுதியிருக்கிறார்.  அவருடைய முன்னுரை சில அரிய விஷயங்களைப் பற்றிப் பேசுவதால், அந்த முழுக் கட்டுரையையும் கீழே தருகிறேன். 

[ நன்றி: கலைஞன் பதிப்பகம் ]

ஓர் இசையரசி

கடைசியாக, எம்.எஸ்.சுப்புலட்சுமி 2004-இல் மறைந்தவுடன் வாலி எழுதிய இரங்கல் கவிதையிலிருந்து ஒரு பகுதி:

ஓதம்சூல் உலகின்காண்-
ஓர்
ஒப்புலட்சுமி -இல்லாதவர்
சுப்புலட்சுமி ;
தூய வாய்மலரால்-
இசைத் தேனைத்
துப்புலட்சுமி


எம்.எஸ்
என்பது
சங்கீத
சாஸ்திரத்தின்
பெண்முக வடிவு ;இப்-
பெண்முக வடிவைப் பெற்றது -வீணை
சண்முகவடிவு !

வீணை சண்முகவடிவு-இவ்
வையத்தை..
விரல்வழி
வென்றார் ;அவரது
குலக்கொடி சுப்புலட்சுமி
குரல்வழி வென்றார் !

அம்புவி மேல்
அவர்போல் -
ஆர்க்கும்
அமைந்ததில்லை தொண்டை;
அஃதேபோல்
அவர் போல்
ஆரும்
ஆற்றியதில்லை ..
தொண்டை வழியாகப்-பொதுநலத்
தொண்டை !

கிருதி;
சுருதி;
இவை
இரண்டும் -
அவரை
அண்டியிருந்தன
தமது
தாயெனக் கருதி
ஒருவரும் கண்டதில்லை -அவை
ஒன்றோடு ஒன்று பொருதி ;
இலயத்தை-
இராகத்தை-
சிவப்பணுவாய் வெள்ளையணுவாய்
சுவீகரித்துக் கொண்டிருந்தது ..
எம்.எஸ் ஆக்கையுள்
எங்கணும் சஞ்சரித்த குருதி !

[ நன்றி : http://udanpirappe.blogspot.in/2012/04/blog-post.html , குமுதம் ரிப்போர்டர் ]


தொடர்புள்ள ஒரு சுட்டி ( 1 ):

கூவி அழைத்தால்: பாம்பே ஜெயஸ்ரீ

தொடர்புள்ள பதிவுகள்:

எம்.எஸ்.சுப்புலக்ஷ்மி

மதுரை சோமு

சங்கீத சங்கதிகள்